Почитувани членови на СИЕР и сите посетители на оваа веб страница,

Ве известуваме дека КОНТАКТ ФОРМА-та во делот КОНТАКТ не е во функција. Ова се должи на технички проблеми, а најверојатно датира од моментот на промена на хостингот пред крај на минаната година.

За жал, за овој проблем не бевме свесни, додека не се обратија телефонски членови кои се обиделе на ваков начин да комуницираат со нас.

Во моментов се работи на отстранување на пречките и повторно оспособување на овој облик на комуникација. До тогаш, ве молиме да ги користите посочените телефони и редовна е-маил адреса.

СИЕР се извинува за настанатиот проблем и ги замолува сите кои преку Контакт форма се обиделe да комуницираат со нас повторно да се јават.

Третата седница на Советот на СИЕР се одржа на 26.12.2017 година. Според традицијата, имаше работен и свечен дел.

Во работниот дел, членовите на Советот расправаа за приоритетите на СИЕР и мерките што треба да се преземат за нивно оживотворување. Имено, земајќи ги резолуциите усвоени на последниот конгрес како главен приоритет, СИЕР веќе се обрати до ресорните министри и Владата во целина со барања за средби заради образложување на нашите барања и согледување на можноститет за нивно остварување што поскоро.

По двонеделното одлагање на испитното рочиште, судот на 29.ноември одлучи: Фени Индустри оди во стечај.

Доверителите имаат рок од 15 дена за пријавување на побарувањата, почнувајќи од 1.декември, а извештајното рочиште и Собрание на доверителите се закажани за 11.јануари 2018 година.

Заинтересираните инвеститори подготвуваат понуди, но работниците останаа во незавидна положба. Не е исплатена платата за октомври, а веќе доспева и ноемвриската плата. Неизвесно е кога и како ќе се исплатат. На средбите во Владата и кај банките синдикалците беа уверувани дека ќе се најде начин за исплата на овие плати. Работниците поставија рок: доколку плата за октомври нема до понеделник до пладне, ќе биде блокирана раскрсницата кај Дреново  во периодот од 12 до 14 часот. Претходната недела најавија дека се спремни и на поголеми облици на притисок, како намалување на снагата на печката и сл. Сепак, сите би сакале да добијат плата, па да нема потреба од протести. Важно е и тоа сите да бидат ангажирани, како и до сега, на одржување на постројките, како што е важно да нема пречки во стечајната постапка и што пократко да трае неизвесностс за нивната и судбината на фабриката.

Во организација на Европската синдикална федерација ИНДУСТРИОЛ во Братислава се одржа Транснационална конференција под мотото „Заедно сме посилни„. Учествуваа претставници на синдикатите –членки на федерацијата од  западноевропските и од регионот. Од Македонија беа присутни СИЕР и СТКЧ.

Конференцијата беше организирана за да се претстават искуствата во организирање нови членови и да се оствари директна соработка меѓу синдикатите од домицилните земји и земјите каде инвестираат мултинационалните компании. За таа цел ИГ Метал веќе отпочнал т.н. Транснационална партнерска иницијатива –ТПИ со помош на која во Унгарија се организирани работниците кои работат во фабриките на Ауди и Мерцедес, на пример.

Меѓународните синдикални федерации ја имаат сериозно сватено потребата од помош на синдикатите во ЈИЕ за организирање на нови членови, за што нудат помош и соработка. Соработката најдобро ќе се остварува директно меѓу синдикатите од земјите од каде доаѓаат инвеститорите и СИЕР, односно другите синдикати од ЈИЕ. Но, за тоа мора да постои заинтересираност и иницијатива од наша страна.

СИЕР секако ќе ја искористи оваа можност и веќе се направени првичните контакти со синдикати од Белгија и Германија. Јасно е дека во глобализацијата капиталот постојано се сели, барајќи подобри погодности и наметнувајќи субстандардна и несигурна работа, ниски плати и т.н. Затоа трудовите стандарди мора да се доближуваат колку што е можно повеќе кон оние од повисокоразвиените земји, што е примарен интерес на работниците и заради што се основаат меѓународните синдикани асоцијации. На глобализирањето на капиталот мора да се одговори со глобализација на трудот и трудовите стандарди.

СИЕР, кој во програмата за работа секогаш давал приоритет на прашањето за организирање на работниците, има особен интерес да направи заеднички акциски планови за организирање со синдикатите од Западна Европа. За остварување на тие планови ветена е конкретна помош како во процесот на подготовка (тренинг на организатори, планирање конкретни активности) така и во спроведувањето на планираното.

На рочиштето одржано на 13.11.2017 година во судот во Велес извршниот директор на Фени Индустри побарал да се преиспита надлежноста на судот, со оглед дека најголемите доверители и предлагачи за стречајната постапка, односно банките, имаат седиште во Скопје.

Врховниот суд на 16.11.2017 годдина истото барање го отфрли, така што надлежноста на судот во Велес е неспорна и се очекува закажување на ново рочиште за отворање на стечајот.

Во меѓувреме, синдикатот ги прави сите напори да се обезбеди редовна исплата на платите за работниците и да се продожи одржувањето на печката во активна сосотојба. За таа цел се одржа уште еден состанок со потпретседателот на Владата Анѓушев на кој беа прецизирани барањата на работниците за задржување на редовните примања и што побрзо рестартирање на фабриката.

Работниците се најзаинтересирани Фени да продолжи со работа со кој и да е инвеститор, кој ќе ги задржи сите нив на работа. Според наши сознанија има заинтересирани инвеститори, кои се спремни веднаш да започнат со работа, што дава надеж дека работата во фабриката наскоро нормално ќе продолжи. Но до расчистување на сите непознаници, неизвесноста за работниците продолжува.

Долгогодишната соработка со данскиот Синдикат 3Ф продолжи во 2017 година со одржување на два семинари, првиот во јули, а вториот минатиот викенд, 10-12.ноември.

Петмина синдикални претставници од различни нивоа во синдикатот (од подружница, до регионален претставник) ги споделија своите искуства со дваесетина синдикални претставници од нашите синдикални организации. Семинарот всушност беше замислен токму како размена на искуства и учење едни од други, а не само како образовна активност.